மனிதாபிமானம்

புலம்பெயர் தொழிலாளிகள்

      அடிமேல் அடிவைத்து

ஆயிரம் மைல்கள் நடந்தார்கள்

ஒவ்வொரு அடியிலும்

      நசுங்கி செத்தது

மனிதாபிமானம்

கொரோனாயணம்

தூணிலும் இருப்பேன்

துரும்பிலும் இருப்பேன்

என்றான் கடவுள்

தும்மலிலும் இருப்பேன்

தொண்டையிலும் இருப்பேன்

என்றார் கொரோனா

நம்மளை கை கழுவ சொன்ன 

அரசாங்கம்

நம்மளை கை கழுவியது

நம்ம வீட்டிலே இருந்தால்

கோரோனா வீதியில்  இருக்கும்

நாம் வீதிக்கு வந்தால்

கொரோனா நம் வீட்டுக்கு  வரும்

மாடத்தில் விளக்கு ஏத்த

நம்ம வீட்டில் எரிந்த விளக்கை

அணைக்க சொன்னார்

   

சத்தமா சாப்பாட்டு தட்டை

தட்ட சொல்லி

சத்தமில்லாமல் நம்மக்கு

திருஓட்டை தந்துசென்றார்

ஊரெல்லாம் அடங்கிக்கிடந்தது

தெருவெல்லாம் முடங்கிக்கிடந்தது

சாதி  வெறி முழித்தே இருந்தது

தேசிய ஊரடங்கில் பணக்காரர்கள்

ராமாயணம் பார்த்தார்கள் 

ஏழைகள் பசியை தின்றார்கள்

வறுமையோடு வாழ்பவர்களை

வைரஸ் சாகும்வரை

வைரசோடும் வாழ சொன்னார்கள்

   

புலம்பெயர்ந்த தொழிலாளிகள்

நடை பிணங்களாக சாலைகளில்

நாய்குட்டிகளுக்கு விமானம்சேவை

ஊருக்குள்ளே நல்ல ஊர்

எங்க ஊர்

பாருக்குள்ளே நல்ல நாடு

எங்க நாடு

ஒரு பூவின் மரணம்

காலையில் பூத்துக் குலுங்கியது மரம்
    மாலையில் பூமியில் கிடப்பவையெல்லாம்
புண்ணைமரத்தின் பூக்கள்
    பூக்களின் ஒவ்வொரு இதழ்களிலும் பூரிப்பு
மிச்சமில்லா வாழ்க்கையின் மகிழ்ச்சி
    ஒரு நாள் வாழ்ந்தாலும் நிறைவனது
பூக்கள் எல்லாம் சொல்லும்
    இறப்பு வலியில்லா சுகம்
மரணம் முடிவில்லா நிறைவு
    பூக்கள் ஒவ்வொன்றும் தென்றலை சுவாசித்தன
சூரியனோடு சுகமாயிருந்தன
    மொட்டிலிருந்து மலரும்போது கிழற்சி
மரத்திலிருந்து பிரியும்போது மகிழ்ச்சி

என்னவளே

செக்க செவந்த புள்ள

      செம்பருத்தி பூப்போல

பக்கத்தில வந்தாலே

      சொக்குதம்மா ஆளை

நித்தம் நித்தம் உன் நினைப்பு

      தித்திக்குமே என் நெஞ்சிலே

முத்துமுத்தாய் உன் பேச்சு

      முத்தமாய் எனக்கினிக்கும்

சிகிச்சை

ஊசி வேண்டாம்

     வலிக்கும்
மாத்திரை
     சாப்பிட்டுக்கோனு
சீட்டு எழுதி கொடுத்தார்
     குழந்தை டாக்டர்
வாங்கி கொண்ட
     நோயாளி பொம்மைகள்

பார்வை

அம்மா…….. பாருமா 
     இவன் என்னை அடிக்கின்றான் 
குரல் வந்த திசையில் திருப்பி 
     ’அடிச்சிக்காம பாத்து விளையாடுங்கள்’ 
கண் தொரியாத அம்மா சொன்னாள்

ஏன் இவர்கள் இப்படி?

எத்தனை தடவை

  அலைகள் அழைத்தாலும்

கரைகள் போவதில்லை

  கடலுக்குள்

எல்லோருக்கும்

  வழிசொல்லும்

வழிகாட்டி பலகைமட்டும்

  யாருடனும் பயணிப்பதில்லை

ஊரின் பெயர் பலகை

   வருவோரை வரவேற்றது

அதுமட்டும் ஊருக்குள்

   வரவேயில்லை